2023 жылғы 27 сәуірде Abai University-де білім беру мен заманауи технологияларға қызығушылық танытатын ешкімді бей-жай қалдырмайтын маңызды оқиға өтті. Қазақстанның педагогикалық жоғары оқу орындарының информатика және робототехника пәні мұғалімдерін даярлайтын оқытушыларының кездесуі – шын мәнінде инновациялық іс-шара болды. Бұл кездесудің мақсаты – пікір алмасу, өзара тәжірибе бөлісу және маңызды тақырыптарды бірлесіп талқылау.

World Cafe форматында өткен шарада келесі өзекті мәселелер қаралды:
- Бағдарламалауды оқыту,
- Білім беру робототехникасы,
- Дарынды студенттермен жұмыс,
- Олимпиадалық қозғалыс,
- STEAM аясындағы техникалық шығармашылық.

Қарастырылған тақырыптар қазіргі кезеңде аса өзекті, себебі білім беру мен технологиялар күн сайын өмірімізде маңызды орын алып келеді. Қазіргі заман бізден үнемі оқуды, дамуды талап етеді, ал жаңа технологиялар білім беру мен жұмыс процесін жетілдіруге және жеделдетуге мүмкіндік береді. Сондықтан осы екі бағытты біріктіретін іс-шара соңғы трендтер мен жетістіктерден хабардар болуға ұмтылатындардың барлығы үшін өте маңызды әрі қызықты.
Кездесу белсенді, серпінді форматта өтті – бұл қатысушыларға маңызды мәселелерді талқылаумен қатар, өз идеялары мен тәжірибелерімен бөлісуге де мүмкіндік берді.
Кездесуге педагогикалық жолын енді бастаған жас мамандардан бастап, тәжірибелі ғалымдар мен сарапшылар да қатысты. Жас оқытушылар аға әріптестерінен құнды тәжірибе мен білім алып, өздерінің де идеялары мен тәсілдерін ортаға салды. Осылайша, бұл кездесу білім беру саласындағы мамандардың түрлі буындары арасындағы өзара тәжірибе мен білім алмасудың алаңына айналды.
Іс-шараны ұйымдастырушы – Абай атындағы ҚазҰПУ Математика, физика және информатика институтының Информатика және білімді ақпараттандыру кафедрасы.

World Cafe қатысушылары:
- Шәкәрім атындағы университет,
- Қазақ ұлттық қыздар педагогикалық университеті,
- Қ.Жұбанов атындағы Ақтөбе өңірлік университеті,
- Оңтүстік Қазақстан мемлекеттік педагогикалық университеті,
- М.Х. Дулати атындағы Тараз өңірлік университеті,
- Е.А. Бөкетов атындағы Қарағанды университеті,
- Қорқыт Ата атындағы Қызылорда университеті,
- М.Әуезов атындағы Оңтүстік Қазақстан университеті,
- Қ.А. Ясауи атындағы Халықаралық қазақ-түрік университеті,
- Х. Досмұхамедов атындағы Атырау университеті,
- М. Өтемісов атындағы Батыс Қазақстан университеті,
- І. Жансүгіров атындағы Жетісу университеті,
- Абай атындағы Қазақ ұлттық педагогикалық университеті,
- «Өрлеу» ұлттық біліктілікті арттыру орталығы,
- Алматы қаласындағы М. Ганди атындағы №92 физика-математика лицейі.