2021 жылдың 13 қарашасында Абай атындағы Қазақ ұлттық педагогикалық университетінде «Бажов Қазақстанда» жобасы аясында Екатеринбург қаласынан келген Ресейлік «БАЖОВ» қайырымдылық қорының өкілдерімен студенттер мен оқытушылардың кездесуі өтті.
Аталған жобаның мақсаты – орыс жазушысы П.П. Бажовтың шығармашылық және мәдени мұрасын балалар мен жастар арасында насихаттау, тарихи жадыны қалпына келтіру және Қазақстан Республикасының мәдени және білім беру мекемелерімен екіжақты ынтымақтастықты кеңейту.
Кездесуді Абай атындағы ҚазҰПУ Халықаралық ынтымақтастық департаментінің директоры міндетін атқарушы Әсел Майс ашты. Ол университет ректоры Дархан Билялов пен басқа да басшылық атынан екатеринбургтік делегацияны құттықтап, бұл кездесу Қазақстан мен Ресей арасындағы мәдени байланысты одан әрі нығайтуға ықпал ететініне сенім білдірді.
«БАЖОВ» қайырымдылық қорының кеңес төрағасы Сергей Полыганов университет ұжымына кездесу ұйымдастырғаны үшін алғыс айтты. Ол Қазақстанда орыс әдебиетіне және оның көрнекті өкілі Павел Бажовқа деген қызығушылықтың жоғары екенін атап өтті, сонымен қатар еліміздегі оқытушылар мен студенттердің ғылыми және педагогикалық деңгейіне оң бағасын берді.
Екатеринбургтегі «Балалар Мейірімділік Ордені» қоғамдық ұйымының төрайымы Марина Черкасова «Бажов Қазақстанда» жобасы аясында жарық көрген Бажовтың «Күміс тұяқ» атты қазақ және орыс тілдеріндегі екітілді ерекше басылымды таныстырды. Ол кітап ресейлік және қазақстандық суретшілердің иллюстрацияларымен безендірілгенін атап өтті.
Ресей ғылым академиясы Орал бөлімінің Философия және құқық институтының аға ғылыми қызметкері Анна Трахтенберг «Бажов Павел Петрович: жазушы және гуманист» тақырыбында баяндама жасап, жазушының өмірі мен шығармашылығы туралы кеңінен айтып берді. Ол сондай-ақ Бажов мұрасын Орал өңірінде қалай сақтап, насихаттап жатқанын да баяндады.
П.П. Бажовтың халық мұрасының музейінің жетекшісі Александр Федосов жазушының ең танымал кейіпкерлерімен таныстыратын «Малахит сандығы» атты бейнебаян ұсынды: Данила-шебер, Синюшка, Даренка мен Кокованя, мыс тау Ханшайымы, От қызы және басқалар.
Барлық баяндамаларды қорытындылаған Сергей Полыганов Павел Бажовтың шығармаларында еңбек адамына деген құрмет пен өз ісіне адалдық тақырыптары көрініс табатынын атап өтті. Бұл құндылықтар бүгінгі күні де өзектілігін жоғалтқан жоқ, сол себепті Бажов шығармашылығы қазіргі заман үшін де маңызды.
Филология және көптілді білім беру институты атынан Орыс тілі мен әдебиеті кафедрасының меңгерушісі Сәуле Әбішева сөз сөйлеп, Павел Петрович Бажовтың шығармалары үлкендер буынына жақсы таныс екенін, ал енді осы мұраны болашақ ұрпаққа жеткізу аса маңызды екенін айтты.
Кездесу соңында Абай атындағы ҚазҰПУ-ға Урал мемлекеттік педагогикалық университетінен әдістемелік және оқу әдебиеттері, сондай-ақ «Күміс тұяқ» кітабы және П.П. Бажовтың өмір жолына арналған Владимир Ушаковтың «Ертегіге апарар жол» атты ғылыми монографиясы сыйға тартылды.