Бүгін Абай университетінде Қытайдың Циндао жоғары педагогикалық мектепке дейінгі білім беру колледжі өкілдерімен ресми кездесу өтті. Делегациясының сапары аясында екі жоғары оқу орны ынтымақтастық туралы меморандумға қол қойды.
Білім және ғылым саласындағы халықаралық серіктестікті дамыту, педагогикалық кадрларды даярлау бағытында ортақ жобаларды жүзеге асыру және тәжірибе алмасуды кеңейту мақсатында Қытайдың Циндао білім ордасымен кездесу жоғары деңгейде өтті. Циндао жоғары педагогикалық мектепке дейінгі білім беру колледжінің өкілдері құрамында Партком хатшысының орынбасары, ректор Фу Жуньюн, шетел тілдері институтының деканы, халықаралық алмасу және ынтымақтастық басқармасының директоры Вен Лимин, Партия хатшысы және Зергерлік іс институтының деканы Лин Бин, Мектепке дейінгі білім беру институты деканының орынбасары Цзю Цзинсян мен шетел тілдері институтының оқытушысы Гуань Ци болды. Ал Абай университеті тарапынан Академиялық қызмет жөніндегі проректор Бану Нарбекова, Стратегия және интернационалдандыру жөніндегі проректор Айгүл Искакова, Академиялық мәселелер жөніндегі департамент директорының м.а Айтөре Баймурзаева, Білім беру бағдарламаларын талдау департаментінің директоры Нұржамал Ошанова, Педагогика және психология факультетінің деканы м.а. Гүлмира Ниетбаева мен кафедра меңгерушілері және Халықаралық бағдарламалар мен ынтымақтастық бөлімінің өкілдері қатысты.
Кездесу барысында тараптар бірлескен білім беру бағдарламаларын әзірлеу, студенттер мен оқытушылардың академиялық ұтқырлығы және тағылымдама алмасу мүмкіндіктерін кеңейту мәселелерін талқылады. Кездесу соңында екіжақты ынтымақтастықты дамыту мақсатында меморандумға қол қойып, халықаралық деңгейде «бір жағадан бас, бір жеңнен қол шығарып» жұмыс істеуге уағдаласты.
Айта кетейік, Циндао жоғары педагогикалық мектепке дейінгі білім беру колледжі – Қытайдың Циндао қаласында орналасқан жоғары кәсіби білім беру мекемесі. Колледждің басты бағыты – ел мен қоғам сұранысына сай техникалық және кәсіби бейіндегі кадрларды даярлау, оның ішінде басымдық мектепке дейінгі білім беру педагогикасы саласына беріледі.
