Қазіргі цифрлық дәуірде алаяқтық тәсілдері қарқынды өзгеріп, интернет арқылы жасалатын қылмыстардың саны артып отыр. Әсіресе әлеуметтік желілерде жалған жарнамаға сеніп, инфлюенсерлердің жасанды «жылтыраған өміріне» алданып, алаяқтардың құрбаны болатын жастар көбейген. Осы орайда, қоғамда киберқауіпсіздік мәдениетін қалыптастырудың маңызы артты.



Осы мәселеге байланысты Абай университетінде «Сандық қауіпсіздік сабақтары» аясында қызметкерлер мен студенттердің цифрлық сауаттылығын арттыру мақсатында «Заң мен тәртіп» тақырыбында оқу семинары ұйымдастырылды. Шарада университеттің Басқарма төрағасы-ректоры Болат Тілеп, Алматы облысы бойынша Экономикалық тергеп-тексеру департаментінің басшысы Әлібек Төлепбергенов, ауыр атлетикадан әлем чемпионы Жасұлан Қыдырбаев және Алматы облыстық мәслихатының депутаты Нұрсұлтан Орынбасаров сөз сөйлеп, жастарға президенттің «Заң мен тәртіп» қағидатын ашып түсіндіріп берді.



Жиынды ашқан ректор Болат Тілеп Мемлекет басшысы Қасым-Жомарт Тоқаевтың «Жаңа Қазақстан» идеясында көрсетілген ашықтық, жауапкершілік және заң үстемдігі қағидалары бүгінгі цифрлық қоғам үшін ерекше маңызды екенін атап өтті.



– Қазіргі заманда дербес деректерді қорғау, онлайн қауіпсіздік және қаржылық сауаттылық әр азаматтың негізгі дағдысына айналуы тиіс, – деді ол.



Семинар барысында спикерлер интернеттегі ақпараттық кеңістікте қауіпсіздікке қатысты проблемаларды, оның ішінде блогерлер тарапынан жасалатын жалған жарнаманың жастарға әсерін де тілге тиек етті. Қауіпсіздіктің алдын алу, ақпаратты тексеру және жеке деректерді қорғау мәдениетін қалыптастырудың маңыздылығын ерекше атап, студенттерге сауаттылық пен білім арттыру маңыздылығын жеткізді.



Алматы облысы бойынша Экономикалық тергеу департаментінің аса маңызды істер жөніндегі жедел өкілі Меруерт Еркінқызы қатысушыларға жасанды интеллектті пайдалана отырып, қауіпсіздікті арттыру жолдарын көрсетті. Ол смартфондағы Face ID, PIN-код, биометриялық саусақ іздері сынды функцияларды дұрыс қолдану, оларды қорғау тәсілдері туралы нақты деректермен кеңес берді. Сонымен қатар, қосымша ақпарат қажет болған жағдайда «Заң мен тәртіп» арнайы әлеуметтік парақшасынан кибергигиенаға қатысты материалдарды қарауға болатыны туралы т.б. маңызды ақпараттар берді.



Семинар соңында қатысушылар жеке деректерді қорғау бойынша сынама тест тапсырып, спикерлермен сұрақ-жауапқа қатысу мүмкіндігіне ие болды.