Бүгін Абай университетінде Әзірбайжан мемлекеттік экономикалық университетінің (UNEC) өкілдерімен ресми кездесу өтті. Кездесудің мақсаты – екі жоғары оқу орны арасындағы академиялық және ғылыми бағыттағы ынтымақтастықты кеңейту, бірлескен жобалар мен бағдарламалар болашағын талқылау.
Әзірбайжан мемлекеттік экономикалық университеті тарапынан кездесуге Орыс Экономикалық Мектебінің директоры, доцент Мансур Бархударов, Орыс Экономикалық Мектебінің директорының орынбасары Лейла Гаджиева, Үздіксіз білім беру орталығының директоры Фуад Гасымов, UNEC ғылыми-зерттеу орталықтарының жұмысын үйлестіру және ұйымдастыру бөлімі бастығы Рена Гусейнова, UNEC қаржы факультеті деканының орынбасары, доцент Әзір Гараев қатысты.
Абай университеті тарапынан іс-шараға қатысқан Академиялық қызмет жөніндегі проректор Бану Нарбекова мен Стратегия және интернационалдандыру жөніндегі проректор Айгүл Искакова университеттің даму басымдықтары мен халықаралық әріптестік бағыттары туралы пікірлерін білдірді.
– Абай университеті үшін халықаралық серіктестермен білім беру сапасын арттыруға бағытталған бастамаларды жүзеге асыру – негізгі стратегиялық міндеттердің бірі. UNEC-пен бірлескен бағдарламалар мен ғылыми жобалар біздің университеттің академиялық әлеуетін күшейтіп, студенттер мен оқытушылар үшін жаңа мүмкіндіктер ашатынына сенімдімін, – деп атап өтті Бану Нарбекова.
Кездесу барысында тараптар ықтимал ынтымақтастық бағыттары, ғылыми-зерттеу жобаларын іске асыру, академиялық ұтқырлықты кеңейту және оқытушылар арасындағы кәсіби байланыстарды нығайту мәселелерін талқылады. Бұл университеттер арасындағы серіктестікті дамытуға және жаңа бірлескен бастамаларға жол ашпақ.
Әзірбайжан мемлекеттік экономикалық университеті – Әзірбайжанның ең ірі экономикалық жоғары оқу орны әрі халықаралық деңгейде танылған білім және ғылыми орталық. UNEC – әзірбайжан, орыс, ағылшын және түрік тілдерінде білім беретін Әзірбайжандағы жалғыз университет. Сондай-ақ, студенттерге Ұлыбритания, Франция, Литва және Швейцария университеттерімен жүзеге асырылатын қос диплом бағдарламаларына қатысу мүмкіндігі ұсынылады.
