24 қараша күні Ташкент қаласында Абай атындағы Қазақ ұлттық педагогикалық университетінің Басқарма төрағасы-Ректоры Болат Тілеп пен Өзбекстанның Мирзо Улуғбек атындағы Ұлттық университетінің ректоры Ином Маджидов арасында ресми кездесу өтті. Жиынға екі оқу орнының халықаралық байланыстар және ғылыми жұмыс жөніндегі проректорлары, факультет декандары қатысып, білім және ғылым саласындағы серіктестікті одан әрі күшейту жолдары талқыланды.
Тараптар жоғары білім беру саласында бірлескен бастамаларды дамыту қажеттігін атап өтіп, қос дипломды магистрлік бағдарламалар әзірлеу, академиялық мобильдікті кеңейту, оқытушылардың біліктілігін арттыру және педагогика, химия, физика мен математика бағыттарында ғылыми зерттеулерді тереңдету бойынша ортақ мақсаттарды белгіледі.
Қазіргі уақытта серіктестіктің алғашқы нәтижелері анық байқала бастады. ҚазҰПУ студенттері сыртқы академиялық мобильдік бағдарламасы арқылы Өзбекстан ұлттық университетінде білім алып жатыр. Сонымен қатар екі университеттің ғалымдары гиперболалық жүйелерді басқару және айырымдық жүйелердің тұрақтылық теориясы бағытында бірлескен зерттеулер жүргізіп, оның нәтижелері Scopus базасындағы Q1, Q2 журналдарында жарияланған бес мақалада көрініс тапқан. Бұдан бөлек, 2026–2028 жылдарға арналған «Көпөлшемді симметриялық гиперболалық жүйелер үшін шекаралық басқару есебінің сандық зерттелуі» атты жаңа ғылыми жобаның тұжырымдамасы әзірленіп, оны жүзеге асыру жұмыстары профессор А.Бердышевтің жетекшілігімен басталды.
Келіссөздер барысында студенттер мен докторанттардың академиялық мобильдігін арттыру, ғылыми жетекшілер арасындағы өзара ынтымақтастықты кеңейту, сондай-ақ «Химия», «Физика» және «Математика» мамандықтары бойынша 1+1 форматындағы қос дипломды бағдарламаларды іске қосу мүмкіндіктері қарастырылды.
Кездесу қорытындысында екі университет арасындағы ынтымақтастық туралы Меморандумның мерзімі ұзартылып, Қазақстан мен Өзбекстан арасындағы білім және ғылым саласындағы стратегиялық серіктестіктің жаңа кезеңі басталды. Бұл келісім аймақтық ғылыми-білім кеңістігін дамытудағы өзара сенім мен ортақ мүдденің жоғары деңгейін көрсетеді.
